വിയന്ന: ഓസ്ട്രിയയിലെ പ്രശസ്ത സാംസ്കാരിക സംഘടനയായ വിയന്ന മലയാളി അസോസിയേഷന്റെ നാല്പതാം വാര്ഷികാഘോഷ സമാപന സമ്മേളനം സാംസ്കാരിക മന്ത്രി കെ.സി. ജോസഫ് ഉദ്ഘാടനം ചെയ്യും.
വിഎംഎ യുടെ 40-ാ മത് വാര്ഷികാഘോഷം ഉദ്ഘാടനം ചെയ്യാമെന്ന് മുഖ്യമന്ത്രി ഉമ്മന് ചാണ്ടി സമ്മതിച്ചിരുന്നുവെങ്കിലും അവസാന സമയം കേരളത്തിലെ പ്രത്യേക രാഷ്ട്രീയ സാഹചര്യത്തില് പരിപാടി റദ്ദാക്കുകയും മറ്റൊരു മന്ത്രിയെ അയയ്ക്കാമെന്ന് സമ്മതിക്കുകയും ചെയ്തു.
മുഖ്യമന്ത്രിയുടെ പ്രത്യേക നിര്ദ്ദേശപ്രകാരം പ്രവാസി ഭാരതീയ ദിവസില് പങ്കെടുക്കുവാന് ഇംഗ്ലണ്ടിലെത്തിയ പ്രവാസി കാര്യ, സാംസ്കാരിക മന്ത്രി കെ.സി. ജോസഫ് വിയന്ന മലയാളി അസോസിയേഷന്റെ സമാപനയോഗം ഉദ്ഘാടനം ചെയ്യുവാന് ഓസ്ട്രിയയില് എത്തും.
ഒക്ടോബര് 21 ന് വിയന്ന വിമാനത്താവളത്തിലെത്തുന്ന മന്ത്രി കെ.സി. ജോസഫിന് വിഎംഎ ഭാരവാഹികള് സ്വീകരണം നല്കും. 22ന് വൈകുന്നേരം 6.30ന് സിബന് ഹിര്ട്ടണില് (സെന്റ് മാര്ട്ടിന് പള്ളി ഓഡിറ്റൊറിയം, കേറ്റ്സര് ഗാസ്സെ) നടക്കുന്ന വിയന്ന മലയാളി അസോസിയേഷന്റെ സമാപനസമ്മേളനവും വിയന്ന മലയാളി അസോസിയേഷന് ചാരിറ്റി ട്രസ്റ്റിന്റെ ഉദ്ഘാടനവും കെ.സി. ജോസഫ് നിര്വഹിക്കും.
സമാപന സാംസ്കാരിക സമ്മേളനത്തിലേക്കു ഏവരെയും ഹൃദ്യമായി സ്വാഗതം ചെയ്യുന്നതായി പ്രസിഡന്റ് മാത്യൂസ് കിഴക്കേക്കര, സെക്രട്ടറി ബീന തുപ്പത്തി, ആര്ട്സ് ക്ലബ് സെക്രട്ടറി പോള് ബാബു തട്ടില് നടക്കിലാന് എന്നിവര് അറിയിച്ചു.
റിപ്പോര്ട്ട്: ഷിജി ചീരംവേലില്
Comments