ആര്‍ദ്രത നിറയുമെന്‍ അമ്മതന്‍ നേര്‍ത്ത
താരാട്ടിനോര്‍മ്മകള്‍ തൊട്ടുണര്‍ത്തി
വന്നെത്തുകയായ് വീണ്ടുമൊരു മാതൃദിനം
ആനന്ദദായമായൊരു മാതൃദിനം

ആമോദമോടിനി കൂടാം നമുക്ക്
ഒന്നിച്ചിരുന്നിനി പാടാം നമുക്ക്
സ്‌നേഹത്തിന്‍ കാഹളം മുഴക്കിടാം നമുക്ക്
നറുതേന്‍ തുള്ളിയായിതു പകര്‍ന്നിടാം നമുക്ക്

സുഗന്ധം വഴിയുന്നെന്‍ അമ്മതന്‍ ഓര്‍മ്മകള്‍
സാന്ത്വനം പകരുന്നുണ്ടെന്‍ സങ്കടങ്ങളില്‍
സൗമ്യമായ് മന്ത്രിക്കയാണിപ്പോഴും മനസ്സില്‍
സാരമില്ലെന്നുള്ളൊരുപദേശം മൃദുവായ്

സ്‌നേഹത്തിന്‍ പൂവാടിയെനിക്കായ് തുറന്നതും
കാരുണ്യകടലാകുമെന്‍ അമ്മതന്നെ.
എന്നുള്ളില്‍ ദൈവീക പൊന്‍വെട്ടം തെളിച്ച
പാവന ദീപ കുടീരമാണ് എന്‍ അമ്മ.

വിശുദ്ധി തന്‍ പൂങ്കാവനിയില്‍ ചിരം
വിലസുന്ന പനിനീര്‍ പൂവായ് എന്നും
മന്ദസ്മിതം തൂകും അമ്മതാന്‍ ചാരെ
പ്രണമിച്ചു നില്‍ക്കട്ടെ ഞാനീ ശുഭദിനം

സാമോദമാര്‍ത്തു പാടുകയായ് ഇവിടെ
പതിവായ് ഈ പൗര്‍ണ്ണമി സന്ധ്യകളില്‍
അമ്മതന്‍ വാത്സല്യ വചനങ്ങളും
താലോലിക്കുമായിരം മധുര സ്വപ്നങ്ങളും

കണ്ണിമയ്ക്കാതെന്നെ നോക്കി നില്കുമമ്മയ്ക്ക്
നക്ഷത്ര കൂടാരങ്ങളില്‍ വസിക്കുമെന്‍ അമ്മയ്ക്ക്
ഹൃദയം നിറയെ നേരുന്നു മംഗളം
മാതൃദിനത്തില്‍ മനോജ്ഞമാം മംഗളം.